தமிழ் திரையுலகின் உச்ச நட்சத்திரமும், தமிழக வெற்றிக் கழகத்தின் தலைவருமான விஜய், தனது திரைப்பயணத்தின் கடைசி காவியமான ‘ஜனநாயகன்’ படப்பிடிப்பை நிறைவு செய்துள்ளார். இந்தத் திரைப்படத்தின் பிரம்மாண்ட இசை வெளியீட்டு விழா மலேசியாவில் கோலாகலமாக நடைபெற்றது. இதில் கலந்துகொண்ட விஜய், கோலாலம்பூரிலிருந்து தனி விமானம் மூலம் இன்று சென்னை திரும்பினார்.
விஜய்யின் வருகையை முன்னறிந்து, சென்னை உள்நாட்டு விமான நிலையத்தின் வெளியே அதிகாலை முதலே ஆயிரக்கணக்கான ரசிகர்கள் மற்றும் கட்சித் தொண்டர்கள் முழக்கமிட்டபடி திரண்டனர். விஜய் வெளியே வந்ததும், உற்சாக மிகுதியால் ரசிகர்கள் அவரைச் சூழ்ந்துகொண்டு கத்திக் கூச்சலிட்டனர். இதனால் அந்த இடமே திருவிழாக்கோலம் பூண்டது.
கூட்டம் கட்டுக்கடங்காமல் போனதால், விஜய்யை அவரது காருக்கு அழைத்துச் செல்வதில் பெரும் சிரமம் ஏற்பட்டது. அவரது தனிப்பட்ட பாதுகாவலர்கள், சென்னை போலீசார் மற்றும் மத்திய தொழில் பாதுகாப்பு படை (CISF) வீரர்கள் இணைந்து அவருக்குப் பாதுகாப்பு வளையம் அமைத்தனர். இருப்பினும், ரசிகர்களின் நெருக்கடியால் காரை நோக்கிச் சென்றபோது விஜய் எதிர்பாராதவிதமாகத் தடுமாறி கீழே விழுந்தார். உடனடியாகப் பாதுகாப்பு அதிகாரிகள் அவரை மீட்டுக் காரில் ஏற்றி பாதுகாப்பாக அனுப்பி வைத்தனர்.
இதனைத் தொடர்ந்து, பலத்த பாதுகாப்புடன் அவர் நீலாங்கரையில் உள்ள தனது இல்லத்திற்குப் புறப்பட்டுச் சென்றார். விஜய்யின் இந்த வருகையாலும், அங்கு ஏற்பட்ட தள்ளுமுள்ளுவாலும் சென்னை விமான நிலைய வளாகத்தில் சிறிது நேரம் பெரும் பரபரப்பு நிலவியது.
