கரூர் வேலுச்சாமிபுரம் பகுதியில் கடந்த 27ஆம் தேதி தமிழக வெற்றி கழகத் தலைவர் விஜய் பிரச்சார கூட்ட நெரிசல் சிக்கி 41 நபர்கள் உயிரிழந்தனர்.
உச்சநீதிமன்ற உத்தரவின்படி சிபிஐ அதிகாரிகள் விசாரணை மேற்கொண்டு வரும் நிலையில் ஆம்புலன்ஸ் உரிமையாளர் மற்றும் ஓட்டுநர் தற்பொழுது சிபிஐ முன்பு ஆஜராகி உள்ளனர். கரூரில் சிபிஐ விசாரணை கடந்த மாதம் 17ஆம் தேதியிலிருந்து நடைபெற்று வருகிறது. குறிப்பாக எஸ்ஐடி குழுவிடமிருந்து பெறப்பட்ட ஆவணங்களை வைத்து, எஸ்.பி பிரவீன் குமார் தலைமையிலான சிபிஐ அதிகாரிகள் முதல் கட்ட விசாரணையை தொடங்கினர்.
தொடர்ந்து கடந்த ஐந்து நாட்களுக்கு முன்பாக வேலுச்சாமிபுரம் சம்பவ இடத்தில் 3டி டிஜிட்டல் ஸ்கேனர் உதவியுடன் சம்பவ இடத்தை அளவீடு செய்யும் பணி நடைபெற்றது. அதன் தொடர்ச்சியாக, கரூர் சுற்றுலா மாளிகையில் தங்கியுள்ள சிபிஐ அதிகாரிகள் வேலுச்சாமிபுரம் பகுதியை சேர்ந்த வியாபாரிகள், பொதுமக்கள் என இதுவரை 25-க்கும் மேற்பட்ட நபர்களிடம் நேரில் கண்ட சாட்சியங்களை பெறுவதற்கான விசாரணை நடத்தினர்.
மேலும் வேலுச்சாமிபுரம் பகுதியில் பாதுகாப்பு பணியில் ஈடுபட்டிருந்த 12 காவலர்கள் மற்றும் 7 உதவி காவல் ஆய்வாளர்கள் சிபிஐ அதிகாரிகள் முன்பு ஆஜராகினர். அதன் தொடர்ச்சியாக இன்று தனியார் ஆம்புலன்ஸ் உரிமையாளர் மற்றும் ஒட்டுனர் இன்று சிபிஐ முன்பு விசாரனைக்கு ஆஜாரகி உள்ளனர்.
அதில் தற்பொழுது வரை ஆம்புலன்ஸ் உரிமையாளர்கள், ஓட்டுனர் உட்பட 11 நபர்கள் சிபிஐ விசாரணைக்கு ஆஜர் உள்ளனர் என்பது குறிப்பிடத்தக்கது.
